TRABALLO REALIZADO POLOS ALUMNOS E ALUMNAS DE 1º DA ESO NA MATERIA DE PROXECTO INTERDISCIPLINAR

Aquí vos presentamos o noso traballo realizado na clase de Proxecto Interdisciplinar, que trata o tema da alimentación sa. Os alumnos e alumnas de 1º A e 1º B da Eso do IES da Terra Chá "José Trapero Pardo" concluímos a nosa tarefa coa exposición dunha cartolinas onde amosamos o noso interese por coñecer todos os aspectos realacionados cos alimentos que inxerimos.

Para que a alimentación sexa equilibrada convén consumir, cada día, produtos de diferentes grupos alimenticios. Para isto é necesario coñecer a roda da alimentación, que inclúe aqueles alimentos que deben estar sempre presentes na nosa dieta; contén, ademais, un código de cores que nos axuda a recoñecer de maneira sinxela e amena cales son os nutrientes máis destacables de cada grupo de alimentos e a función que ditos nutrientes desempeñan no noso organismo. Dentro da roda podemos atopar os seguintes grupos:

-Grupo I: Leite e derivados

-Grupo II: Carnes, peixes e ovos

-Grupo III: Legumes, froitos secos e patacas

-Grupo IV: Hortalizas e verduras

-Grupo V: Froitas

-Grpo VI: Cereais, azucres e derivados

-Grupo VII: Graxas e aceites

Na roda da alimentación temos alimentos con función plástica (leite, carne e peixe), con función enerxética (aceites, cereais...), aqueles que xogan un papel regulador (froitas e verduras) e outros con función múltiple (patacas, legumes e froitos secos).

Ademais de estudar os tipos de alimentos segundo a súa orixe, a súa función (reguladores, enerxéticos e plásticos) e segundo a súa composición (lípidos, glícidos, proteínas ou prótidos, vitaminas, sales minerais, elementos e auga), intentamos elaborar unha dieta ideal que proporcione enerxía suficiente e que conteña proteínas (15%), graxas (30-40 %) e hidratos de carbono (50-60%).

A dieta galega ten as características da que se coñece como "dieta atlántica" cun consumo elevado de peixe (branco e azul), marisco, carne, legumes e hortalizas, patacas, pan, aceite, viño e froita abundante. Descubrimos que Galiza é a comunidade española con maior consumo de produtos lácteos (113 litros por habitante ao ano), verdura, peixe e cereais, e o país atlántico con maior consumo de froita. Mais tamén cómpre ter en conta que a dieta galega actual ten un exceso de sal e graxas saturadas co conseguinte risco de desenvolver problemas cardiovasculares e hipertensión.

Despois de todo o proceso de traballo realizado na materia de Proxecto Interdisciplinar chegamos á conclusión de que debemos elaborar unha dieta axeitada e equilibrada para facer fronte ás necesidades enerxéticas e de construción e funcionamento do organismo e manter unha boa saúde. Por todo isto comprometémonos a consumir diariamente alimentos sans.